கடமையைச் செய்து கட

Get Across Doing Karma
கடமையைச் செய்து கட
————————–
நித்தமும் ஆசைகள் நெஞ்சினி லோசைகள்
சித்தனா யெப்படிச் சேர்வது? மொத்தமும்,
சிந்தித் தெறித்துச் சிதறும் மனதது
முந்திடச் சொல்வீர் மொழி
அத்தனைத் தேடலும் ஆட்டும் மனதினைப்
பித்தம் பிடித்திடப் பேணினேன்- சத்தமாய்,
ஆழ்கடல் மீதினி லாடுங் கலமென
வாழ்வினை வாட்டும் வலி
துறப்பதால் ஆசை தொலைவது மில்லை
மறப்பதால் கூடும் மடங்கு – பிறப்பும்,
மடமை யெனாது மனிதம் வளர்க்கும்
கடமையைச் செய்து கட
வேண்டும் பொருளெனும், வேட்கை மனிதனை
ஆண்டு கிடக்குது ஆழமாய்-தூண்டிலைப்
போடும் மனதின் பொறியினில் சிக்காது
நாடி நகர்தல் நலம்
நதிநேசன் கணேஷ்
(நேரிசை வெண்பா)
26/05/2021